كروكات البطاطا باللحم المرحي

السلام عليكم اولا اما بعد المعروف عنّا نحن الجزائريات كثرة استعمال البطاطا في اطباقنا واليوم حبيت نعطيكم وصفة ساهلة والكثيرمنكم جربوها واللي هي كروكات البطاطا باللحم المرحي ونبداو مع المقادير
بسم الله نحتاجوا في هاذ الطبق الى:
1.5كغ بطاطا
2ملاعق كبيرة زبدة
3سنينات ثوم مسحوقة
1كاس صغير فرينة(سيم)
2بيض مخفوق
1كاس خبز يابس مرحي
ملح
زيت للقلي
الحشو:
500غ لحم مرحي
1بيضة
1بصلة مهشمة
1ملعقة كبيرة خبز يابس مرحي
2ملاعق كبيرة معدنوس مقطع
1/2(نصف)ملعقة صغيرة فلفل اسود
1/2ملعقة صغيرة فلفل احمر
1/2ملعقة صغيرة كمون
1ملعقة صغيرة زبدة
ملح
طريـــــــــــــــــقة التحضير:
1-قشري البطاطا,اغسليها ومن بعد قطعيها الى اجزاء.غليها,قطريها وارحيها في الطاحونة اليدوية.زيديلها الثوم,الزبدة والملح.خليها على جنب
2-تحضير الحشو:في غميقة خلطي اللحم المرحي,بيضة,البصلة,1ملعقة كبيرة خبز يابس مرحي,المعدنوس,الملح,الفلفل الاسود والاحمر,كمون والزبدة.
3-شكلي كريات صغيرة من الحشو واقليها في زيت سخون
4-شكلي كريات متوسطة الحجم من خليط البطاطا واحشي كل كرية بطاطا بكرية اللحم المرحي
5-مرريها في الفرينة,غطسيها في البيض المخفوق وبعدها رمديها في الخبز اليابس المرحي
6-اقلي كروكات البطاطا في زيت سخون بزاف حتى تولي ذهبية اللون ومن بعد قطريها على ورق ماص وقدميها مع السلاطة
شكرا وشهية طيبة نتمنى تجربوها