حكاية الشيرنغ الفضائي (الحلقة الثالثة والأخيرة)

منقول للأهمية وللأمانة من منتدى يهتم بمواضيع الشيرنغ


المهم منرجع لموضوعنا .. الشيرنج الفضائي شلون بشتغل .. حلو كتير نفس الخطوات السابقة .. لكن بدل ما يحول جهازه لسيرفر بعمل مشاركة مع موقع حاجزه لألو ؟!! يعني أنا اليوم حجزت موقع حلو .. هاد الموقع عبارة عن مساحة تخزين على قرص صلب لمخدم موصول كله بالشبكة العنكبوتية الأم .. وهاد الموقع ألو IP بياخدك لهل المخدم > بعدين لهل المساحة ياللي بدك ياها > وهي ياللي موجوده فيها الصفحات ياللي أنتة مصممها . وهاد الرقم موحد غير ياللي نحنة منشوفه فمثلاً www.kooora.com = 216.93.181.137 وهاد الرقم منحصل عليه بوضع تعليمة أثناء تواجدك على الشبكة .. من قائمة أبدأ تشغيل ping www.kooora.com طبعاً بإمكانك تتأكد من كلامي بانو تنسخ هل الرقم 216.93.181.137 وتحطه بمربع العناوين وتكبس إنتر .. وشوف لوين بدو ياخدك ؟!!

على كل حال هاد الرقم منخليه شوي عل زيق ومنرجع لموضوعنا !
حكيت أنو بعد ما يعمل سيرفر بعمل مشاركة أو مزامنة بين كومبيوتره وموقعه بحيث كل الشيفرات ياللي عم تتغير بشكل سريع كتير تكون أول بأول على موقعه ؟!!
أية وشلون بدو بيعتها لكل الناس عن طريق الإنترنت الفضائي ؟؟!!
حلو كتير .. هلق منرجع للحلقة الأولى .. أنا قلت أنو وقت اللي مستخدم واحد بيطلب البيانات الشركة بتبعت هل البيانات على كامل تغطية القمر صح ؟ صح .. لكن بتصل بس للشخص ياللي طلب ينزل عندو محتويات هل الرابط ليش لأنو في عندو فلتر مراقب كل العناوين ياللي عم تنطلب عن طريق المستعرض المستخدم عنده .. ها ها

نفس المبدأ .. المعلومات عم ترتسل موقعه .. عن طريق خطو ال DSL ياللي سرعته لنقول 4 ميغا بت بالثانية يعني بأقل من أجزاء الثانية بيكون كل ال ECM صار على موقعه ياللي عنوانو لنقول مثلاًُ هاد 216.36.49.209 ! وهوة بيكون عنده (صاحب دنكل Y4) مثلاً إشتراك شرعي للإنترنت الفضائي على مزود Skylogic الموجود بقمر W6 حلو ؟!! أخونا وبكل بساطة فاتح الإنترنت الفضائي ودائماً عم يحدث نفس الصفحة ؟!؟!!!
مممممممممممم .. عرفتوا أينة صفحة ؟؟!! الصفحة ياللي موجود فيها الموقع ياللي عم يبث لألو الشيفرات !! وبهيك بيكون دائماً كل جديد هذا الموقع يبث فضائياً لكل من يصل إليه إشارة هذا القمر !! يعني دائماً فاتح هل الموقع وعم يكبس F5 F5 F5 وعم تنطلب المعلومات وعم تجيه ؟!! بس مو ألو بس .... ها ها .. لكل الناس .. ومو كل الناس رح تفهم المعلومات الطائرة هي !! لأ أبداً .. وإنما فقط ياللي عندون الدنكل !!! واللي هوة عبارة عن ريسيفر عادي منزل ألو سوفت وير (سوفت وير الدنكل) واللي هوة أشبه ببرنامج Skynet المعروف ؟!! ومستثنى منه كل شي ماعدا موقع واحد ؟!! شو هوة يا حلوين ؟؟
هوة هاد 216.36.49.209

يعني منعيد شوي شوي .. المعلومات عم ترتسل من السيرفر لموقع أول بأول (مزامنة تلقائية) .. صاحب المركز دائماً عم يطلب هل الموقع عن طريق الإنترنت الفضائي .. المعلومات عم تبث دائماً فضائياً لكل الناس لانو هوة كل ثانية عم يحدث الصفحة ! وبالتالي فضائياً كل ثانية عم ينبث شي جديد وعلى كامل تغطية القمر .. الصحن التاني موجه على هل القمر والدنكل محدد ألو بس ياخد المعلومات المطلوبة من هل الموقع .. بياخدها بيحولها إلى للريسيفر ... هووووووب فتحت المحطة !! ليش .. الحمد لله على وصول السيد ECM بالسلامة .. بعد رحلة فضائية راااائعة !!

البرنامج المستخدم :
هلق في عدة برامج بس أنا بعرف واحد منها بس وهوة اللي حصلت عليه من أحد (الهكر المحترفين) وأكد ألي أنو هاد البرنامج المستخدم في سيرفرات الشيرنج الفضائي وللأسف رح أحط بس صوره (لأسباب خاصة) يمكن بالمرحلة الحالية البرنامج مو للنشر !! بس لا تخافوا هوة عندي (وبأيدي أمينة كمان)
وهوة بكل الأحوال معقد - وأنا مالي مجرب أشتغل عليه صراحةً - لأنو أعقد من التعقيد نفسه .. منشوف الصور

بهل الواجهة منلاحظ وجود قائمة على اليسار فيها صيغة التصدير لملف ECM إما بصيغة XML أو بصيغة TXT والغالب الثانية والله أعلم . والخانات هي لضبط القارئات الموصولة على كومبيوتر المخدم من 1-8 متل مالكون شايفين يعني بس بيسع 8 كروت باقات !!

بهل الصورة شايف شي مميز يمكن يكون ألو علاقة بظاهرة (كود التفعيل) لبعض أجهزة الشيرنج الفضائي ؟!!
بمسمى DES Key !

بهل الصورة منشوف إعدادت ألها علاقة بحدوث الأخطاء وكيفية التعامل معها .. من ناحية تجاهل شي وقت حدوث خطأ غير متوقع .

بهل الصورة بتنحط معلومات بقلب سوفت وير الدنكل لأنو متل مالكون شايفين محطوط خانة IP

وهون منحط معلومات الموقع ياللي عم تتم معه المشاركة لحتى نبعت ألو .. وهاد الضبط للبرنامج !! ولا حظوا ليش شكرت أستاذ جلال حمامي ؟!! لأنو شرحوا لموقع dyndns كان بوقته وبمحله !

بروتوكول Twin Protocol
حصلت عليه مؤخراً وهوة التعليمات ياللي لازم تدمج داخل السوفت ويرات ليصيروا يدعموا شي أسمو البروتوكول الثنائي , وأهم شي لازم تلاحظوه هو المطالبة بتحديث كل ثانية .. أو التأقلم على التحديث أو تلقي المعلومات كل ثانية
لاحظوا هل الجزء من التعليمة
(موجود بملف مفكرة داخل التنزيل)

request every second.
Answer in a second.
Key datas are all "00" mean no key.
Sample source code ------------------------------------------------------------
IRD => dongle .
int SSSP_DoCommand07(void)
وللتحميل من المرفقات طبعاً هاد مفيد في حال وجود محترفين بدون يدخلوا أجهزة معينة ما بتدعم بروتوكول توين منشان تشغل الدنجل .. بس بدو الواحد يكون محترف ليعدل على باتشات الأجهزة !

ورح تشوفوا بهل الصور صور لدناكل المستقبل !! أوووف أش عرفني ؟!
رح قلكون بكل بساطة .. الدناكل الموجودة بالسوق كلها كانت جيل جديد من الرسيفرات الحديثة (المحمولة) لكن لأنو صغار حولوهون لدناكل عن طريق تنزيل برامج متل برامج Skynet لكن بتخصيص سحب من IP محدد متل ما شرحنا .
وبالنسبة ل Y4 فهوة كمان ريسيفر وسوفت ويره الأساسي موجود عندي . وهوة بالأصل ريسيفر عادي متطور أكتر من ميكروبوكس أسمه The Colours ومجهز بمنفذ USB للتسجيل . ومروحة صغيرة بدل المبرد الموجود حالياً .

طبعاً الإيرانيين قاموا بطلب من الصين بتصنيع ريسيفر شبيه لإستخدامه كدنجل وصار أسمه Cabel Tester
والدفعات القديمة كان فيها منفذ AV جنب منفذ ال DATA RS232 الموجود حالياً بعدين لغوه وشالوا منفذه من البورد حتى ! لكن يمكن نحسن نرجع هاد المنفذ .. وعلى كل حال لسع في فترة منيحة لتاريخ 15/2/2010 .

أخيراً .. لا بد من شكر الأصدقاء الذين ساعدوني في إنجاز هذا الشرح الحصري والأول على كل المنتديات العربية

1- المهندس ثائر كسار (سورية - حلب)
2- الأخ صابر هشام (المملكة المغربية)
3- الأخ خالد المعاني ( المملكة الأردنية)
4- الأخ شهروز (فريق دعم الشيرنج في إيران)

ختاماً .. كل الشكر لكم .. والمعلومات الواردة مجهود شخصي وكتابة ذاتية بدون نقل ولا أي حرف من أي منتدى وهي طبعاً معروفة لي .. ولكن أنا شعرت بسعادة وأنا أكتب هذا الموضوع لساعات طويلة لأنني على قناعة أن هنالك من يريد أن يكون مشروع المستقبل .. وعندها سيذكرني بالخير إن شاء الله .
النقل مسموح , لكن السرقة ممنوعة , والشكر مستحب لكن غير ملزم , لأن مجرد قرائتك لموضوعي الطويل هذا وإهتمامك بالتفاصيل بيكون وصلني حقي !!

دمتم بخير .