الشخشوخة البوسعادية بالصور

من طرف RimA الجمعة نوفمبر 09, 2012 1:20 pm

حبيباتي جبتلكم اليوم طبق كنت نظن انه صعب

بحكم زواجي من بوسعادي لازم طبعا نتعلم طبخهم

وحماتي الله يذكرها بخير صاحبة القلب الكبير وروح الدعابة

محبتش تعلمني قاتلي نشوفك الا تجيبيها وحدك....

يوم عيد الفطر من عادات اهل المنطقة

أنهم يطيبوا الشخشوخة

خطفت منها شوي ولما سمعت اني طيبتها ماتت بالضحك

ولما شافت الصور قاتلي غلبتيني

وهاذي هي الصور -أول مرة -

أولا لعجينة تتعمل بالماء و الملح و فرينة + سميد نص بنص

و اللي تحب تعمل سميد وحدوا شادة شوي روحها على عجينة الرقاق

تخليها ترتاح ومبعد تقرصيها

تاخذي 3 قرص وتحليهم شوي وتحطيهم فوق بعضهم وتكملي تحليها

وعلى طاجين الطين تاع البغرير - الغرايف - تطيبيها

و تفتتيها كيما الثريدة لكن باليد

وتحضري لاصوص

- طماطم - بصلحة ثوم و البهارات + لحم أو دجاج وتقليهم مليح وتخليهم يطبخوا

قبل ما تغلقي على النار تكوني محضرة كمية كبيرة تع بصل مقطع لنصف شرائح

كبيرة تحطيه على البرمة و تظيفي ورق الرند + الفاح + الحار + قليل من الثوم

وكي اطفي النار + الكسبر

تجيبي الفتات و تخلطيه مع الصوص اللي تكوني خليتي منها شوي للوجه

تزينيها بالكسبر و البيض

تؤكل مصحوبة بالرب - يشبه المعجون - مصنوع بالتمر + الدهان العربي

وهذا شكلها النهائي تقريبا

و شهيتكن طيبة