كاتشوب منزلي مجرب سابقا............رائع

صلصة الكاتشوب


السلام عليكم ورحمة الله تعالى وبركاته



أنيقاتي الغاليات كنتمنى دائما تكونو في صحة وسلامة إن شاء لله

فالحقيقة من شحال هادي وانا كنفتش على وصفة للكاتشوب وكنلقا أن النتيجة غير مرضية

وليوم فالصباح لقيت الوصفة فبرنامج المطبخ مع الشيف يسري جزاه لله خير الجزاء


لذالك غادي نعطيكم الوصفة والطريقة بالتفصيل والحمد لله غادين نتهناو من المواد الحافضة لي غادي تخرج علينا وعلى وليداتنا لله يحفضهم

المقادير :
كيلو ونصف طماطم حمراء + 100 غ سكر لي كيساوي نصف كأس زايد شوية+ نصف كأس خل + م ص ميزينا + ربع م ص ملح ( الشيف مستعملوش ) + رشة إبزار أبيض






قطعت مطيشة على زوج ونزلتها فالطنجرة على الجهة لي مقطعة كيف واضح باش تنزل لما ديالها بسرعة ومتحرقش حيت مغديش نعملو لما



ضفت مطيشة كاملة وغطيتها مزيان على عافية مهيلة شوف كيف طلقت لما



منين طابت طحنتها فالخلاط الكهربائي






وصفيتها ورديتها للطنجرة تغلي



ضفت عليها السكر والخل والنشا لي كنصحكم تدوبوه ف م ص د لما عاد تضيفوه




هنا بدات كتشرب وتعقاد ضفت عليها لملح وادا حسيتي انها معقداش مزيان ممكن تضيفي شوية د ميزينا



كنتمنى تجربوها وتنال إعجابكن و أي استفسار إن شاء لله أنا في الخدمة