قلي واش تعرف في بلادك قلي واين روحت ..واش هي الاماكن الي زرتها..

من طرف hana20 الخميس ديسمبر 22, 2011 8:28 pm

السلام عليكم

اليوم راح نقدملكم موضوع جديد .....كل واحد يكتب و يقول واش هي الاماكن الي زارها في الجزائر و لايات بلديات دوائر و شواطئ...الخ و ثاني كل واحد يقول و اش هي الاماكن الي يحب يزورها مستقبلا
طبعا الهدف هو تشجيع الشباب باش يعودو يحوسو في بلادهم كلها و تشجيع السياحة الداخلية

رايح نبدا انا و نشاء الله قاع تلحقوني من بعد

الجزائر العاصمة و ضواحيها: المهم من رغاية و رويبة شرقا الى زيرالدة غربا و من باب الواد و الابيار شمالا الى بابا علي جنوبا
البليدة: لافيل: سيدي ياعيش ، الصومعة و بوفاريك حتى االبوينان الشفة و موزاية
بومرداس: لافيل، خميس الخشنة و حتى دشرة (دوار) لاقيطون الي توحشانا ناسو بزاف
البويرة: ماشفتش لافيل بصح شفت عين بسام
المدية: لافيل ، البرواقية، بني سليمان، قصر البخاري
تيبازة: ماشفتش لافيل مي روحت الى شرشال حجوط دواودة و فوكة مارين
عين دفلى: ماشفتش لافيل مي روحت الى خميس مليانة و طلعت الى مليانة بلاصة هايلة بزاف
بجاية: لافيل، خراطة، سوق الاثنين، أوقاس وشاطئ تيشي الرائع و حتى آقبو روحت ليها
تيسمسيلت: لافيل
المسيلة: لافيل، و بوسعادة الاكثر من رائعة (نقصو من الزعاف و نشاء الله تولو ولاية....ههههه)
سطيف: لافيل، العلمة ، الرصفة ، عين ولمان
تيارت: تقريبا نعرف هذه الولاية شبرا بشبر المهم من ملاكو و مدغوسة و فرندة الى دحموني و مهدية و حمادية و السوقر و مدريسة .
جيجل: لافيل و شواطئها و زيامة منصورية و شواطئها الرائعة
معسكر: لافيل و حمام بوحنيفية
الجلفة: لافيل ،مسعد ، الشارف، حاسي بحبح و عين وسارة
باتنة: لافيل، عين توتة، امدوكال و بريكة
أم البواقي: ما شفتش لافيل مي روحت الى عين مليلة ..بلاد لبياس ديتاشي كلشي تلقاه ثما
الاغواط: لافيل و آفلو
سكيكدة: لافيل ،عزابة و خاصة شاطئ سطورة الي عندنا فيه ذكريات مليحة
سيدس بلعباس: لافيل و نعرف لافيل مليح سيدي ياسين و لاكبول و الحسناوي ...الخ
قالمة: هنا نزيد شوية لديتاي هذي الولاية الي زدت و تربيت فيها ...نبدا بواد الزناتي، راس العقبة، حمام دباغ ،هواري بومدين، مجاز عمار، الفجوج، حمام اولاد علي، بوعاتي محمود، هيليوبوليس، قلعة بوصبع، النشماية، بلخير، بومهرة، جبالة لخميسي، بني مزلين، بوشقوف و مجاز عمار
سعيدة: سعيدة فيل و حمام ربي
عنابة: نعرفها مليح ثاني ، ناس قالمة يروحو بزاف لعنابة، نبدا بالباردة و الحجار و سيدي عمار ونزيدو الشواطئ شابي و الطوش و عين عشير
غرداية: لافيل و زلفانة فيها ثاني حمام مليح
وهران: لافيل و عندنا فيها ذكريات ملاح مع لحباب
بسكرة: لافيل، اولاد جلال و الدوسن الي نحييو صحابنا ثما
عين تموشنت: لافيل، بوحجر، المالح، شاطئ تارقة و بني صاف و شاطئها الرائع.
القالة: لافيل و شواطئها و ثاني الحضيرة الوطنية للطيور و الغابات الرائعة تاعها
ورقلة: لافيل و تقرت حبسنا فيها (نظن تابعة لواد سوف)
تلمسان: لافيل و حبيت نشوف مرسى الحجاج بصح جا بعيد بزاف على تلمسان فيل
سوق أهراس: لافيل و حتى لحدادة (كنت ندخل عليها لتونس ...كاش نهار ثاني ندير الولايات تعها...خخخخ و تونس العاصمة نعرفها مليح بلاك خير من الجزائر العاصمة و ثاني الحمامات و سوسة سيرتو أبو نواس و بور القنطاوي.... قريب تولي تابعة لينا .....خخخخخخخخ)

المهم هذو هما الاماكن الي زرتهم و راني نتمى نزور ادرار، مستغانم و سيرتو سيرتو تمنراست .

نتمنى انشاء الله المشاركة من الجميع و كل واحد يحكي واش شاف وثاني واش عجبو......