غراتان بادنجان بطريقة جديدة-من مطبخي

السلام عليكم و صحا فطوركم جميعا
ليوم درت غراتان دنجال في الفرن بطريقة جديدة شفته في حصة منال العالم و جربته
و حبيت نشاركه معاكم ان شاء الله يعجبكمه
في الاول نبداو بالدنجال نختاروا حبات يكونوا صغار و لعدد على حساب افراد العائلة
نخلوا الحبة كاملة و نقوها برك من فوق شوية و نقشروها و نقلوها في الزيت حتى تتحمر


بعدها وجدت الكفتة بالطريقة العادية خلطت الكفتة مع لمعدنوس و زوج سنينات ثوم و حبة بصل صغيرة
و معدنوس و ملح و فلفل اسود و زدت عليها شوية شابلير باش تجي طرية و درتها صبيعات و قليتها في شوية زيت تاني


من بعد درت لاصوص و هي صوص عادية تاني قليت البصل مع حبة فلفل حلو و زدت عليهم طماطم مرحية و شوية طماطم مصبرة
و ملح و فلفل اسود و شوية فلفة حمرا و زدت عليهم كمية شوية كبيرة نتاع لما


و الخطوة الاخيرة هي نفتحوا حبات الدنجال في النص و نحطوا فيهم صبيعات لكفتة و نديروهم في طبق الفرن
و نصبوا عليهم كامل لاصوص و لازم تكون بزاف شوية كيما راكم تشوفوا و كلشي راح يتجمر في الفرن


نخلوها في الفرن حتى الدنجال يتشرب كل كمية لاصوص و راهي وجدت
تجي بنتها شابة بزاف و طعم مختلفه


صحا سحور الجميع